Засгийн газрын өнөөдрийн хуралдаанаас гарсан шийдвэрийг салбарын сайд нар мэдээлэв.
Засгийн газрын Хэрэг эрхлэх газрын дарга Н.Учрал “Зөвшөөрлийн тухай хуульд нэмэлт өөрчлөлт оруулж, спортын бооцоот тааврыг зөвшөөрч, үүнээс бусад бооцоот таавар, цахим мөрийтэй тоглоомыг бүрэн хориглох хуулийн төслийг УИХ-д нэн яаралтай горимоор өргөн мэдүүлэхээр шийдвэрлэлээ.
Харилцаа холбооны зохицуулах хорооноос цахим мөрийтэй тоглоомын үйл ажиллагаа явуулдаг нийт 6036 домайн хаягт Монгол Улсаас хандах хандалтыг хязгаарласан хэдий ч холбоосыг сольж, VPN ашиглан үүнийг зохион байгуулсаар байна.
Тэгэхээр Зөвшөөрлийн тухай хуульд өөрчлөлт оруулаад цахим мөрийтэй тоглоомыг хөхүүлэн дэмждэг агент буюу зуучлалын үйл ажиллагааг бүрэн хориглохоор хуулийн төсөл боловсруулж УИХ-д өргөн барина. Өөрөөр хэлбэл, Зөвшөөрлийн тухай хуулиар цахим мөрийтэй тоглоомыг бүрэн хориглоно гэсэн үг. Хууль батлагдаад хэрэгжиж эхэлснээр IOS болон App store, Мета компани руу шаардлага тавина. Улмаар IOS болон APP store-оор бүх төрлийн цахим мөрийтэй тоглоомын аппликэйшнүүд татагдахаа болино.
Хэрвээ хууль зөрчиж цахим мөрийтэй тоглоомыг өөр линкээр, VPN-ээр татан тоглож, тоглоом зохион байгуулж, зуучилж байвал хуулийн хариуцлага хүлээлгэнэ. Өөрөөр хэлбэл, цахимаар мөрийтэй тогловол Монголбанкнаас гадагш урсаж буй валютыг хязгаарлан, царцаах боломж хуулийн хүрээнд бий болно гэв.
