Монгол Улсын Ерөнхийлөгч асан Цахиагийн Элбэгдорж геополитикийн өөрчлөлт болон шийдвэр гаргах түвшинд эмэгтэйчүүдийн дуу хоолой хэчнээн чухал болохыг онцолсныг “The Elders” цахим хуудас нийтэлжээ. Цахиагийн Элбэгдоржийн “The Elders”-т хүргүүлсэн захидлыг бүрэн эхээр нь хүргэж байна.
Хүндэт найзууд минь,
ОХУ-ын бүрэн хэмжээний харгис түрэмгийлэл эхлээд гурван жил өнгөрчээ. “The Elders” Украины зоригт ард түмэн болон ардчилсан сонгуулиар сонгогдсон тэдний ерөнхийлөгч Зеленскийтэй эв нэгдлээ хадгалсаар байна.
Гэвч дайн үргэлжилсээр, геополитикийн нөхцөл байдал хурдацтай, огцом өөрчлөгдөж буйг бид харж байна. Ялангуяа энэ нь АНУ-ын шинэ засаг захиргаатай хамаатай. Мөргөлдөөн нэн эгзэгтэй үе шат руугаа орж байгаа бөгөөд аливаа энхийн хэлэлцээрт Украин шууд оролцох нь туйлын чухал болоод байна.
Дээр дурдсан нөхцөл байдал өнгөрсөн сард миний оролцсон Мюнхены аюулгүй байдлын бага хурлын агуулгыг тодорхойлсон юм. Тэнд би “The Elders”-ийн нөхөд болох Хуан Мануэл Сантос, Мэри Робинсон, Хелен Кларк, Зейд Ра’ад Аль Хуссейн нартайгаа уулзсан билээ.
Бүх нийтийн болон хувийн уулзалтууд, аль алиных нь үеэр бидний мессеж тодорхой бөгөөд тууштай байв. Удирдагчид мөргөлдөөнийг шударга, тогтвортой байдлаар шийдвэрлэх хамгийн сайн арга болох олон талт тогтолцоо, олон улсын хууль эрх зүйг хамгаалж, урагшлах хэрэгтэй. Энэ зарчим нь бидний анхаарч буй Израиль-Палестин, ОХУ-Украин, Мьянмар гэх гурван гол мөргөлдөөн болон Судан, Ардчилсан Конго зэрэг бусад тоо томшгүй олон газар дахь мөргөлдөөнд хамаарна.
Дэлхий дахин арга барилаа өөрчлөх шаардлагатай болжээ гэдэг бодол чуулганы дараа надад төрсөн юм. Олон улсын эмэгтэйчүүдийн эрхийг хамгаалах өдрийг угтан хөндөхөд, эртнээс нааш эрчүүд давамгайлдаг байсан энх тайван, аюулгүй байдлын салбар болон дэлхийн манлайллын бүхий л түвшинд эмэгтэйчүүдийн дуу хоолойг хүргэх шинэ арга замыг олж нээх хэрэгтэй болжээ.
“The Elders”-ийн хувьд хүйсийн тэгш байдал, эмэгтэйчүүдийн манлайллыг дэмжсээр ирсэн хөдөлшгүй түүхтэй байгууллага. Бид сүүлийн үед “Найман тэрбумын төлөө нэг” гэх кампанит ажлын уриалгыг дэмжих болсон билээ. Энэ нь зөвхөн эрчүүд манлайлсан 80 жилийн дараа эмэгтэйчүүд НҮБ-ын тэргүүнээр ажиллаж эхлэх цаг болсон гэх уриалга юм.
НҮБ-ын шилэн тааз хөндөгдөөгүй хэвээр. Энэ байгууллага 21 дүгээр зуунд үндсэн зорилгодоо нийцэж буй эсэхийг баталгаажуулах нь чухал. Шаардлагад бүрэн нийцсэн нэр дэвшигчийг эрэлхийлэх шударга, ил тод үйл явцаар дамжуулан дараагийн ерөнхий нарийн бичгийн даргаар эмэгтэй хүнийг томилох явдал үүнд багтана.
Гишүүн орнууд нэр дэвшигчээ нэрлэх цаг ойртож буй энэ цаг үед бид тэднээс дээрх зорилгыг дэмжиж, зөвхөн эмэгтэй хүмүүсийг нэр дэвшүүлээсэй гэж хүсч байна. Энэ бол бидний хувьд дорвитой өөрчлөлтийг эхлүүлж, дэлхий дахинд тулгараад буй хамгийн том сорилтуудыг шийдвэрлэхэд эмэгтэйчүүд чухал үүрэгтэй гэсэн мессежийг илгээх боломж юм.
Илүү тогтвортой, нэгдмэл ертөнцийг бий болгохыг хүсч байгаа л бол эмэгтэйчүүд ижил тэгшээр дуу хоолойгоо өргөх ёстой гэдгийг бид баталгаажуулах учиртай. Үүнийг бид бэлгэдлийн шинж чанартай бус зайлшгүй шаардлагатай зүйл гэдгийг баталгаажуулах ёстой.
Та бүхний байнгын дэмжлэгт баярлалаа.
Цахиагийн Элбэгдорж
ЭХ СУРВАЛЖ: THE ELDERS, NEWS.mn
