ВАШИНГТОН, 2026 оны 1 дүгээр сарын 3 (Reuters) — АНУ Венесуэлд шөнийн цагаар цэргийн цохилт өгч, тус улсын Ерөнхийлөгч Николас Мадуро-г баривчилсан талаар АНУ-ын Ерөнхийлөгч Дональд Трамп бямба гарагийн өглөө мэдэгдлээ.
Трампын хэлснээр, уг ажиллагааг АНУ-ын хууль сахиулах байгууллагуудтай хамтран явуулсан бөгөөд Мадуро болон түүний эхнэрийг баривчилж, Венесуэлээс гарган шилжүүлсэн аж. Тэрбээр энэ тухай өөрийн Truth Social хуудсаар дамжуулан зарлаж, дэлгэрэнгүй мэдээллийг Флорида муж дахь Мар-а-Лаго амралтын газарт 11:00 цагт хийх хэвлэлийн бага хурлаар танилцуулна гэжээ.
АНУ Венесуэлийн удирдлагыг “хар тамхины улс (narco-state)” байгуулсан, мөн 2024 оны сонгуулийг луйвардсан хэмээн удаа дараа буруутгаж ирсэн. Харин Мадуро эдгээр мэдэгдлийг няцааж, АНУ Венесуэлийн дэлхийд хамгийн томд тооцогдох газрын тосны нөөцийг хяналтдаа авах зорилготой хэмээн мэдэгдсээр ирсэн юм.
Венесуэлийн тал эсэргүүцэл илэрхийлэв
Венесуэлийн Батлан хамгаалахын сайд Владимир Падрино улсын телевизээр мэдэгдэл хийхдээ, “чөлөөт, тусгаар тогтносон Венесуэл гадаадын цэргүүдийн оролцоог хатуу эсэргүүцэж байна” хэмээгээд, ард иргэдийг нэгдэн эсэргүүцэхийг уриалжээ.
Одоогоор Венесуэлийн засгийн газар Мадуро баривчлагдсан эсэхийг албан ёсоор батлаагүй байгаа ч, нийслэл Каракас болон бусад бүс нутагт хүчтэй дэлбэрэлтүүд болсон тухай мэдээлэл гарсан байна. Үүний улмаас онц байдал зарлаж, цэргийг бүрэн дайчилсан гэж эх сурвалжууд мэдээлжээ.
Каракаст дэлбэрэлтүүд болж, иргэд айдаст автав
Reuters агентлагийн мэдээлснээр, бямба гарагийн үүрээр Каракас хотод ойролцоогоор 90 минутын турш дэлбэрэлт, нисэх онгоцны чимээ сонсогдож, тэнгэрт хар утаа, галын гэрэл харагдсан байна. Зарим дүүрэгт цахилгаан тасарч, томоохон цэргийн баазуудын ойролцоо дэлбэрэлт болсон тухай орон нутгийн хэвлэлүүд мэдээлжээ.
Орон нутгийн иргэд нийгмийн сүлжээнд айдас, тодорхойгүй байдлаа илэрхийлж, “засгийн газраас бодит мэдээлэл алга, зөвхөн төрийн телевизийн мэдээ л байна” хэмээн ярьжээ.
Олон улсын хариу үйлдэл
Венесуэлийн холбоотон орнууд болох Куба, Иран АНУ-ын цохилтыг эрс буруутгаж, Иран үүнийг “үндэсний бүрэн эрх, нутаг дэвсгэрийн халдашгүй байдлыг ноцтой зөрчсөн үйлдэл” хэмээн НҮБ-ын Аюулгүйн зөвлөлд хандахыг уриалсан байна.
Латин Америкийн олон улс Мадурогийн засаглалыг шүүмжилдэг ч, АНУ шууд цэргийн ажиллагаа явуулсан нь бүс нутагт өнгөрсөн үеийн гашуун дурсамжийг сэргээж, ихээхэн эсэргүүцэл дагуулж болзошгүйг ажиглагчид онцолжээ.
Хууль эрх зүйн маргаан үүсэв
АНУ-ын энэхүү цэргийн ажиллагаа ямар хууль эрх зүйн үндэслэлээр явагдсан нь одоогоор тодорхойгүй байна. Сүүлийн саруудад АНУ хар тамхины наймаанд холбоотой хэмээн сэжиглэсэн завь, хөлөг онгоцуудад цохилт өгч, 110 гаруй хүн амиа алдсан нь олон улсын эрх зүйчдийн шүүмжлэлийг дагуулсаар байгаа юм.
Эх сурвалж: Reuters
